FELLOWSHIP OF GOD MINISTRY

“പിതാവു എനിക്കു തരുന്നതു ഒക്കെയും എന്റെ അടുക്കൽ വരും; എന്റെ അടുക്കൽ വരുന്നവനെ ഞാൻ ഒരുനാളും തള്ളിക്കളകയില്ല. “
യോഹ 6:37

യേശുവിന്റെ അടുക്കൽ വരുവാൻ യോഗ്യതയുള്ളവരായി
ശിശുക്കളെ യേശു കണ്ടു. അതിനാൽ ശിശുക്കളെ തൻ്റെ അടുക്കലേക്കു കൊണ്ടുവരുമ്പോൾ തടഞ്ഞവരോടു യേശു പറഞ്ഞു.

” ശിശുക്കളെ എന്റെ അടുക്കൽ വരുവാൻ വിടുവിൻ; അവരെ തടുക്കരുതു; ദൈവരാജ്യം ഇങ്ങനെയുള്ളവരുടെതല്ലോ.” മർക്കൊസ് 10:14

ശിശുക്കളുടെ മനസ്സുപോലെ നിഷ്കളങ്ക ഹ്യദയത്തോടെ വരുന്നവർക്കു ദൈവം സ്വർഗ്ഗരാജ്യം വാഗ്ദത്തം ചെയ്യുന്നു.യേശുവിന്റെ അടുക്കൽ വന്നാൽ
ലഭിക്കുന്ന ധാരാളം ഗുണങ്ങൾ ഉണ്ടു.

1)യേശുവിന്റെ അടുക്കൽ വരുന്നവരെ യേശു ആശ്വസിപ്പിക്കുന്നു.

” അദ്ധ്വാനിക്കുന്നവരും ഭാരം ചുമക്കുന്നവരും ആയുള്ളോരേ, എല്ലാവരും എന്റെ അടുക്കൽ വരുവിൻ; ഞാൻ നിങ്ങളെ ആശ്വസിപ്പിക്കും. മത്തായി 11:28

കുടുംബത്തിൽ പിതാവിനേയും മാതാവിനേയും ജോലികാര്യങ്ങളിൽ സഹായിച്ച യേശുവിനു അദ്ധ്വാനത്തിന്റെ വിലയറിയാം. ഭാരം ചുമക്കുന്നവരുടെ വേദനയും അറിയാം. ഇന്നു ധനവാന്മാർ
ദരിദ്രരെ മാറ്റി നിറുത്തുന്നു. എന്നാൽ യേശു ദരിദ്രരുടെ അടുക്കലേക്കിറങ്ങി വരുന്നു. ആരോഗ്യമുള്ളവർ രോഗികളെ
മാറ്റി നിറുത്തുന്നു. എന്നാൽ യേശു രോഗികളെ ച്ചേർത്തു പിടിച്ചു. തൻ്റെ അടുക്കൽ നിലവിളിച്ചു വന്ന കുഷ്ഠരോഗിയേയും ഭൂതഗ്രസ്തനേയും, കുരുടനേയും
മുടന്തനേയും, അനാഥരേയും ആലംബഹീനരേയും യേശു തള്ളികളഞ്ഞില്ല. യേശുവിൻ്റെ
അടുക്കൽ വന്ന പാപികളേയും
യേശു കൈവിട്ടില്ല. യേശു പാപത്തെ വെറുത്തു പാപിയെ സ്നേഹിച്ചു.

2) യേശുവിൻ്റെ അടുക്കൽ വരുന്നവർക്കു യേശു ജീവൻ
നൽകുന്നു.

“എങ്കിലും ജീവൻ പ്രാപിക്കേണ്ടതിന്നു എന്റെ അടുക്കൽ വരുവാൻ നിങ്ങൾക്കു മനസ്സില്ല”. യോഹ 5:40

യേശുവിന്റെ അടുക്കൽ വരുന്നവർക്കു സമ്യദ്ധിയായ
ജീവൻ ലഭിക്കുന്നു.

‘ മോഷ്ടിപ്പാനും അറുപ്പാനും മുടിപ്പാനും അല്ലാതെ കള്ളൻ വരുന്നില്ല; അവർക്കു ജീവൻ ഉണ്ടാകുവാനും സമൃദ്ധിയായിട്ടു ഉണ്ടാകുവാനും അത്രേ ഞാൻ വന്നിരിക്കുന്നതു.
യോഹന്നാൻ 10:10

3) യേശുവിന്റെ അടുക്കൽ വരുന്നവനെ യേശു ഉയിർപ്പിക്കുന്നു.

“എന്നെ അയച്ച പിതാവു ആകർഷിച്ചിട്ടല്ലാതെ ആർക്കും എന്റെ അടുക്കൽ വരുവാൻ കഴികയില്ല; ഞാൻ ഒടുക്കത്തെ നാളിൽ അവനെ ഉയിർത്തെഴുന്നേല്പിക്കും.
യോഹന്നാൻ 6:44

4) യേശുവിന്റെ അടുക്കൽ വരുന്നവൻ്റെ ഉള്ളിൽ നിന്നും
ജീവജലത്തിൻ്റെ നദികൾ ഒഴുകും. അവൻ വിശപ്പും ദാഹവും അറികയില്ല.

“എന്റെ അടുക്കൽ വരുന്നവന്നു വിശക്കയില്ല; എന്നിൽ വിശ്വസിക്കുന്നവന്നു ഒരു നാളും ദാഹിക്കയുമില്ല.” യോഹ 6:35

“ദാഹിക്കുന്നവൻ എല്ലാം എന്റെ അടുക്കൽ വന്നു കുടിക്കട്ടെ.
എന്നിൽ വിശ്വസിക്കുന്നവന്റെ ഉള്ളിൽനിന്നു തിരുവെഴുത്തു പറയുന്നതുപോലെ ജീവജലത്തിന്റെ നദികൾ ഒഴുകും” എന്നു വിളിച്ചു പറഞ്ഞു.
യോഹ 7:37,38

നാം ദൈവത്തിനോടു അടുത്തു ചെന്നാൽ അവൻ നമ്മോടു അടുത്തു വരും.

“ദൈവത്തോടു അടുത്തു ചെല്ലുവിൻ; എന്നാൽ അവൻ നിങ്ങളോടു അടുത്തുവരും. യാക്കോബ് 4:8

5) യേശുവിനോടു അടുത്തു വന്നാൽ യേശു നമുക്കു വേണ്ടി
പക്ഷവാദം ചെയ്യുകയും പൂർണ്ണമായി രക്ഷ നൽകുകയും ചെയ്യും.

“അതുകൊണ്ടു താൻമുഖാന്തരമായി ദൈവത്തോടു അടുക്കുന്നവർക്കു വേണ്ടി പക്ഷവാദം ചെയ്‍വാൻ സദാ ജീവിക്കുന്നവനാകയാൽ അവരെ പൂർണ്ണമായി രക്ഷിപ്പാൻ അവൻ പ്രാപ്തനാകുന്നു.
എബ്രായർ 7:25

6) യേശുവിന്റെ അടുക്കൽ വന്നാൽ കരുണയും ക്യപയും
യേശു വാരി കോരി തരുന്നു.

ആ ക്യപാസനം
ജാതിമതഭേദമന്യേ സർവ്വർക്കായും തുറന്നു കിടക്കുന്നു. യേശുവിന്റെ അടുക്കൽ ആർക്കും എപ്പോൾ വേണമെങ്കിലും കടന്നു വരാം. യേശുവിനു മുഖപക്ഷമില്ല. തൻ്റെ അടുക്കൽ വരുന്നവരെ
മാറോടണയ്ക്കുവാൻ നമ്മുടെ യേശു നാഥൻ കടന്നുവരും.

“അതുകൊണ്ടു കരുണ ലഭിപ്പാനും തത്സമയത്തു സഹായത്തിന്നുള്ള കൃപ പ്രാപിപ്പാനുമായി നാം ധൈര്യത്തോടെ കൃപാസനത്തിന്നു അടുത്തു ചെല്ലുക. എബ്രായർ 4:16

നമുക്കുള്ള സകലവും ദൈവത്തിന്റെ ദാനമായിരിക്കെ
ദാനമല്ല എന്നു ചിന്തിച്ചു അഹങ്കരിക്കുന്നവരാണു മിക്കവരും. യഹോവയുടെ വചനം ശ്രദ്ധിക്കു

“ഞാൻ പണിതതു ഞാൻ തന്നേ ഇടിച്ചുകളയുന്നു; ഞാൻ നട്ടതു ഞാൻ തന്നേ പറിച്ചുകളയുന്നു;
യിരെമ്യാവു 45:4

വിലാപത്തിൻ്റെ
പ്രവാചകനായിട്ടാണു യിരെമ്യാവു
അറിയപ്പെടുന്നതു. യിരെമ്യാവിൻ്റെ കൂടെ നടന്നു ശുശ്രൂഷ ചെയ്ത ബാരൂക്കിനു
ഒരുപാടു വേദനകളും ആവലാതികളും ഉണ്ടായിരുന്നു.
ആ ആവലാതിക്കും, ഞരക്കത്തിനും, ദു:ഖത്തിനും ഉള്ള
മറുപടി, ദൈവം യിരെമ്യാ പ്രവാചകനിലൂടെ നൽകുന്നു.
ആ മറുപടിയാണു മുകളിൽ
പ്രതിപാദിച്ചിരിക്കുന്നതു.ഈ വചനം നമ്മെ വലിയ സത്യം പഠിപ്പിക്കുന്നു. നാമാകുന്ന മുന്തിരി വള്ളിയെ എവിടെ നടണമെന്ന് നിശ്ചയിക്കുന്നത് ദൈവമാണ്.ചെത്തി വെടിപ്പാക്കുന്നത് എപ്പോഴാണ് എന്ന് നിശ്ചയിക്കുന്നത് ദൈവമാണ്. എത്രമാത്രം
ചെത്തണമെന്ന് നിശ്ചയിക്കുന്നതും ദൈവമാണ്. അത് നമ്മെ വേദനിപ്പിക്കുവാൻ അല്ല.
ദൈവം ആരുടേയും വേദനകൾ കൂട്ടുന്നവനല്ല. സകല വേദനകളുടേയും ദു:ഖത്തിൻ്റേയും പുറകിൽ ദൈവത്തിനു ഒരു വലിയ പദ്ധതി
വെളിപ്പെടുത്തുവാനുണ്ടു.

ദൈവത്തിനു നടുവാനും,
പണിയുവാനും, പൊളിക്കുവാനും
അവകാശമുണ്ടു. എന്തിനാണു
ദൈവം നട്ടതു പറിക്കുന്നതു?
എന്തിനാണു ദൈവം പണിതതു
പൊളിക്കുന്നതു? എന്നു നാം ചോദിച്ചേക്കാം.
നിന്റെ ഉടയവനായ ദൈവത്തിനറിയാം
അതു കൂടുതൽ ഫലഭൂയിഷ്ഠമായി നിന്നെ വളർത്താനാണെന്നു. ഉടയവനറിയാം നീ കൂടുതൽ മനോഹരമായി
പണിയപ്പെടാൻ പോകയാണെന്നു.

ഒരു ഭവനത്തിന്റെ ഉടമസ്ഥൻ വീടു
പണിത്
കൊണ്ടിരിക്കുമ്പോൾ
താൻ ഉദ്ദേശിച്ച രീതിയിൽ ആ ഭവനം പണിയപെട്ടില്ല, കുറേകൂടി
മനോഹരമാക്കാം
ആയിരുന്നു എന്നു തോന്നുമ്പോൾ ഭവനത്തിന്റെ പൂമുഖമോ, അടുക്കളയോ, കുളിമുറിയോ ഇടിച്ചുകളഞ്ഞു, വീണ്ടും കൂടുതൽ മനോഹരമായി പണിയുന്നതു കണ്ടിട്ടുണ്ടു. അങ്ങനെ ഇടിച്ചുകളയുമ്പോൾ എന്തിനാണു
അതു ചെയ്തതെന്നു ആരും ചോദിക്കയില്ല. കാരണം അയാൾ
ആ ഭവനത്തിന്റെ യജമാനനാണു. ഇടിക്കുവാനും
പണിയുവാനും അവകാശമുള്ള
ഒരേ ഒരു വ്യക്തി ഭവനത്തിൻ്റെ ഉടയവനാണ്. നമ്മുടെ ദൈവമാണു നമ്മുടെ ശരീരമാകുന്ന ഭവനത്തിന്റെ അവകാശി.
നമ്മുടെ ശരീരം ദൈവത്തിൻ്റെ മന്ദിരമാണ്. ദൈവീക പദ്ധതിക്കനുസ്യതമായി നാം
പണിയപ്പെട്ടില്ലെങ്കിൽ അതു ഇടിച്ചു കളഞ്ഞു മനോഹരമായി പണിയാൻ, നമ്മെ ഒന്നുമില്ലായ്മയിൽ മെനെഞ്ഞെടുത്ത ദൈവത്തിനു
അവകാശമുണ്ടു. കാരണം നാം
ഓരോരുത്തരെ കുറിച്ചും ദൈവത്തിനു വലിയ പദ്ധതികൾ ഉണ്ടു. യിരെമ്യാ പ്രവാചകൻ തന്നെ അതു പ്രതിപാദിക്കുന്നു.

” നിങ്ങൾ പ്രത്യാശിക്കുന്ന ശുഭഭാവി വരുവാൻ തക്കവണ്ണം ഞാൻ നിങ്ങളെക്കുറിച്ചു നിരൂപിക്കുന്ന നിരൂപണങ്ങൾ ഇന്നവ എന്നു ഞാൻ അറിയുന്നു; അവ തിന്മെക്കല്ല നന്മെക്കത്രേയുള്ള നിരൂപണങ്ങൾ എന്നു യഹോവയുടെ അരുളപ്പാടു.
യിരെമ്യാവു 29:11

യശയ്യാപ്രവാചകനും
ദൈവീകപദ്ധതിയെ കുറിച്ചു ഇങ്ങനെ രേഖപ്പെടുത്തി.

“എന്റെ വിചാരങ്ങൾ നിങ്ങളുടെ വിചാരങ്ങൾ അല്ല; നിങ്ങളുടെ വഴികൾ എന്റെ വഴികളുമല്ല എന്നു യഹോവ അരുളിച്ചെയ്യുന്നു.
ആകാശം ഭൂമിക്കുമീതെ ഉയർന്നിരിക്കുന്നതുപോലെ എന്റെ വഴികൾ നിങ്ങളുടെ വഴികളിലും എന്റെ വിചാരങ്ങൾ നിങ്ങളുടെ വിചാരങ്ങളിലും ഉയർന്നിരിക്കുന്നു.
യശയ്യാവു 55:8,9

കുശവൻ പാത്രങ്ങൾ മെനയുമ്പോൾ ചീത്തയായവയെ ഉപേക്ഷിച്ച് കളയുന്നില്ല. അവയെ വീണ്ടും ചവിട്ടി കുഴച്ച് അവയെ മനോഹരമായ പാത്രങ്ങളായി കുശവൻ മാറ്റുന്നു. കുശവൻ്റെ കരങ്ങളിൽ സമർപ്പിക്കപ്പെടാത്ത ഒരു പാത്രവും മനോഹര പാത്രമായി തീരുന്നില്ല.

“കുശവൻ കളിമണ്ണുകൊണ്ടു ഉണ്ടാക്കിയ പാത്രം അവന്റെ കയ്യിൽ ചീത്തയായിപ്പോയി; എന്നാൽ കുശവൻ അതിനെ തനിക്കു തോന്നിയതുപോലെ മറ്റൊരു പാത്രമാക്കിത്തീർത്തു.
യിസ്രായേൽഗൃഹമേ, ഈ കുശവൻ ചെയ്തതുപോലെ എനിക്കു നിങ്ങളോടു ചെയ്‍വാൻ കഴികയില്ലയോ എന്നു യഹോവയുടെ അരുളപ്പാടു; യിസ്രായേൽഗൃഹമേ, കളിമണ്ണു കുശവന്റെ കയ്യിൽ ഇരിക്കുന്നതുപോലെ നിങ്ങൾ എന്റെ കയ്യിൽ ഇരിക്കുന്നു”
യിരേമ്യാവു 18:4,6

ദൈവത്തിനു നമ്മെ കുറിച്ചു ഉന്നത പദ്ധതികൾ ഉണ്ടു. നാം
ആരാകണം, നമ്മുടെ മക്കൾ ആരാകണം എന്നു ദൈവം
മുൻകൂട്ടി നിശ്ചയിച്ചു വച്ചിട്ടുണ്ടു. അവൻ പറിച്ചുകളയാം, തകർത്തുകളയാം.
എന്നാൽ
കൂടുതൽ മനോഹരമായി പണിയും..ആ ദൈവീക പദ്ധതി വെളിപ്പെട്ടു കിട്ടുവാനും
ദൈവീകപദ്ധതിക്ക്
അനുസ്യതമായി
പണിയപ്പെടുവാനും നമ്മേയും
നമുക്കുള്ള സകലത്തേയും സ്രഷ്ടാവിൽ സമർപ്പിക്കാം..

വേദപുസ്തകം പ്രതീക്ഷയുടെ
പുസ്തകമാണു. കാത്തിരിപ്പിന്റെ
പുസ്തകമാണു.
നമ്മുടെ കർത്താവു എത്രയും വേഗം വരും. അതിനു മുൻപേ നാം ഒന്നും വിധിക്കരുതു. ഇനി രക്ഷയില്ലെന്നു പറയരുതു.
നാം എത്രനാൾ കാത്തിരിക്കേണം.

1) നമ്മുടെ കർത്താവു വരുവോളം.

കർത്താവിനു വേണ്ടി ധീരമായി പോരാടിയ പൗലൊസ് അപ്പൊസ്തലനു പല ന്യായവിസ്താരങ്ങളും നേരിടേണ്ടി വന്നു. പൗലൊസിന്റെ
നേരെ പല കുറ്റാരോപണങ്ങളും
ഉണ്ടായി. എന്നാൽ പൗലൊസിനു
ഒരു പ്രതീക്ഷ
ഉണ്ടായിരുന്നു.
എൻ്റെ കർത്താവു വരും. അതിനാൽ പൌലൊസ് കൊരിന്ത്യ സഭക്കു ലേഖനം എഴുതിയപ്പോൾ ഇപ്രകാരം എഴുതി.

“ആകയാൽ കർത്താവു വരുവോളം സമയത്തിന്നു മുമ്പെ ഒന്നും വിധിക്കരുതു; അവൻ ഇരുട്ടിൽ മറഞ്ഞിരിക്കുന്നതു വെളിച്ചത്താക്കി ഹൃദയങ്ങളുടെ ആലോചനകളെ വെളിപ്പെടുത്തും; അന്നു ഓരോരുത്തന്നു ദൈവത്തിങ്കൽനിന്നു പുകഴ്ച ഉണ്ടാകും. 1കൊരിന്ത്യർ 4:5

2) ഉയരത്തിൽ നിന്നും ശക്തി ലഭിക്കുവോളം.

” എന്റെ പിതാവു വാഗ്ദത്തം ചെയ്തതിനെ ഞാൻ നിങ്ങളുടെമേൽ അയക്കും. നിങ്ങളോ ഉയരത്തിൽനിന്നു ശക്തി ധരിക്കുവോളം നഗരത്തിൽ പാർപ്പിൻ ”എന്നും അവരോടു പറഞ്ഞു.
ലൂക്കോസ് 24:49

ഉയരത്തിൽ നിന്നും ശക്തി ലഭിച്ച
ശിഷ്യർ യരുശലേമിൽ മാത്രം ഒതുങ്ങി നിന്നില്ല. അവർ യഹൂദയിൽ എല്ലായിടത്തും
പുറജാതികളുടെ ഇടമായ ശമര്യയിലും ഭൂമിയുടെ അറ്റത്തോളം ദൈവത്തിന്റെ സാക്ഷികളായി.നമ്മെ നാമായിരിക്കുന്ന പ്രതിസന്ധികളിൽ നിന്നും, പരിമിതികളിൽ നിന്നും, വിടുവിച്ചു
വിശാലമായ ലോകത്തിലേക്കു
നയിച്ച് യേശുവിന്റെ സാക്ഷിയായി ദൈവം ഉയർത്തും. ആയതിനു ഉയരത്തിൽ നിന്നും
ശക്തി ലഭിക്കുവോളം കാത്തിരിക്കേണം.

3) ഉയരത്തിൽ നിന്നും ആത്മാവിനെ പകരുവോളം
കാത്തിരിക്കേണം.

” ഉയരത്തിൽനിന്നു ആത്മാവിനെ നമ്മുടെമേൽ പകരുവോളം തന്നേ; അപ്പോൾ മരുഭൂമി ഉദ്യാനമായിത്തീരും; ഉദ്യാനം വനമായി എണ്ണപ്പെടും.”
യശയ്യാവു 32:15

ഇപ്പോൾ ജീവിതം ഒരു മരുഭൂമിയായിരിക്കാം. ഭവനങ്ങളിൽ മുള്ളും പറക്കാരയും മുളെച്ചു നിൽക്കുന്നുണ്ടാകാം..
അവ നമ്മെ കുത്തി നോവിക്കുന്നുണ്ടാകാം. എന്നാൽ പഴിപറയാതെ
ക്ഷമയോടെ, വിശുദ്ധിയോടെ കാത്തിരുന്നാൽ ഉയരത്തിൽ
നിന്നും ദൈവം ആത്മാവിനെ
പകർന്നു ശക്തി തരും. അപ്പോൾ മുള്ളും പറക്കാരയും ആത്മാവിന്റെ തീയ്യിൽ വെന്തെരിയും. അവിടം
സന്തോഷം നൽകുന്ന
പൂങ്കാവനമാകും.

4) ക്യപലഭിക്കുവോളം കാത്തിരിക്കേണം.

വേഴാമ്പൽ വെള്ളത്തിനായി കാത്തിരിക്കുന്നതുപോലെ ഉയരത്തിൽ നിന്നും ക്യപയുടെ
നീർച്ചാലുകൾ ഒഴുകി വരുന്നതുവരെ കാത്തിരിക്കുക.നിന്ദകളും
പരിഹാസങ്ങളും, കുത്തുവാക്കുകളും, അവഗണനയും , പരിഹാസവും
നേരിടുമ്പോൾ അവയെല്ലാം സഹിച്ച്,
ലോകത്തെ ജയിച്ചവനായ ക്രിസ്തുവിലേക്കു
ക്യപ ലഭിക്കുവോളം നോക്കി കൊണ്ടിരിക്കുക.

” ദാസന്മാരുടെ കണ്ണു യജമാനന്റെ കയ്യിലേക്കും ദാസിയുടെ കണ്ണു യജമാനത്തിയുടെ കയ്യിലേക്കും എന്നപോലെ ഞങ്ങളുടെ കണ്ണു ഞങ്ങളുടെ ദൈവമായ യഹോവയിങ്കലേക്കു, അവൻ ഞങ്ങളോടു കൃപചെയ്യുവോളം നോക്കി
ക്കൊണ്ടിരിക്കുന്നു.
123-ാം സങ്കീ 2-ാം വാക്യം.

പ്രാർത്ഥനയിൽ ക്ഷീണിച്ചുപോകരുതു.
കർത്താവു
വരുവോളം, ഉയരത്തിൽ നിന്നും ശക്തി
ലഭിക്കുവോളം , ക്യപലഭിക്കുവോളം കാത്തിരിക്കേണം. ക്യപയും ശക്തിയും ലഭിക്കുവാൻ വചനമാകുന്ന വാൾ കരങ്ങളിലേന്താം. നിരാശയുടെ
കരിതിരികൾ ജീവിതത്തിൽ നിന്നും തുടച്ചുമാറ്റാം..
ഭവനങ്ങളിലെ വേദന നൽകുന്ന മുള്ളുകളേയും
പറക്കാരയേയും തീജ്വാലയാകുന്ന വചനത്താൽ
ഭസ്മീകരിക്കാം.
പരിശുദ്ധാത്മാകുന്ന എണ്ണയാൽ
നാമാകുന്ന വിളക്കിനെ
പ്രശോഭിതമാക്കി തണ്ടിന്മേൽ
വച്ച വിളക്കായി
മറ്റുളളവർക്കു പ്രകാശം പകർന്നു
മുന്നോട്ടു പോകാം.. യേശു
വരുവോളം ദീർഘക്ഷമയോടെ
പ്രത്യാശയോടെ കാത്തിരിക്കാം.
നമ്മുടെ പ്രാണപ്രിയൻ വരും…

“അധർമ്മം പെരുകുന്നതുകൊണ്ടു അനേകരുടെ സ്നേഹം തണുത്തുപോകും.
എന്നാൽ അവസാനത്തോളം സഹിച്ചുനില്ക്കുന്നവൻ രക്ഷിക്കപ്പെടും.
മത്തായി 24:12,13

” ആകയാൽ നിങ്ങളുടെ മനസ്സു ഉറപ്പിച്ചു നിർമ്മദരായി യേശുക്രിസ്തുവിന്റെ പ്രത്യക്ഷതയിങ്കൽ നിങ്ങൾക്കു വരുവാനുള്ള കൃപയിൽ പൂർണ്ണ പ്രത്യാശ വെച്ചുകൊൾവിൻ.”
1പത്രോസ് 1:13

ദൈവീകക്യപ വരും എന്ന പൂർണ്ണപ്രത്യാശ നേടണമെങ്കിൽ
മനസ്സു ദൈവത്തിൽ ഉറപ്പിച്ചു വയ്ക്കണം.
അതിനു അഗാധമായ ദൈവവിശ്വാസം വേണം. മനസ്സിന്റെ ഉറപ്പു ഒരുവനെ ശുഭമുഖത്തു
എത്തിക്കുന്ന വിശ്വാസകപ്പലിൻ്റെ
ചുക്കാൻ ആകുന്നു. മനസ്സിൽ വിശ്വാസം ഉണ്ടായാൽ ജീവിതത്തിൽ സകലകാര്യത്തിനും ഉറപ്പുണ്ടാകും. വിശ്വാസകപ്പലിനു
നേരെ ഓളങ്ങളും, തിരമാലയും ഉണ്ടാകും. കൊടുങ്കാറ്റും, ഈശാനമൂലൻ കാറ്റുകളും അടിക്കും. എന്നാൽ കപ്പലിൽ
വിള്ളൽ ഉണ്ടായാൽ കപ്പലിൽ വെള്ളം കയറി മുങ്ങിപോകും.
ജീവിതത്തിൽ പലരും നമ്മെ നോക്കി പലതും പ്രവചിച്ചു എന്നു
വന്നേക്കാം. ഇനി യാതൊരു രക്ഷയുമില്ല എന്നു പറഞ്ഞു
എന്നുവരാം. അപ്പോൾ
മനസ്സിടിയരുതു. ആദ്യവിശ്വാസം
തള്ളികളയരുതു.
ദൈവത്തെ സംശയിക്കരുതു. കാറ്റത്തു അലയുന്ന കടൽതിര കണക്കെ
മനസ്സു ആടിയുലയരുതു. മനസ്സിനെ ക്രിസ്തു എന്ന പാറയിൽ കെട്ടിയിടണം.

പത്രോസ് ലേഖനം എഴുതുമ്പോൾ
മനസ്സിനെ ക്രിസ്തുവിൽ ഉറപ്പിക്കുവാൻ ആവശ്യപ്പെടുന്നു.
കാരണം പത്രോസ് തൻ്റെ ജീവിതാനുഭവങ്ങളിൽ നിന്നാണു അതു പറയുന്നതു. യേശുവിന്റെ
കൂടെ വസിക്കുന്ന സമയം തൻ്റെ മനസ്സു പലപ്പോഴും പതറിപോയി.
യേശു താൻ യരുശലേമിൽ വച്ചു
കഷ്ടമനുഭവിച്ചു ക്രൂശുമരണം
ഏറ്റുവാങ്ങും എന്നു പറഞ്ഞപ്പോൾ പത്രോസിന്റെ മനസ്സിനെ അതിൽ ഉറപ്പിക്കാൻ
പത്രോസിനു കഴിഞ്ഞില്ല. പത്രോസ് യേശുവിനോടു അതു നിനക്കു സംഭവിക്കരുതേ എന്നു പറഞ്ഞു. അതിനു യേശു പറഞ്ഞ മറുപടി ഇപ്രകാരമാണു.

“സാത്താനേ, എന്നെ വിട്ടുപോ; നീ എനിക്കു ഇടർച്ചയാകുന്നു; നീ ദൈവത്തിന്റേതല്ല മനുഷ്യരുടേതത്രെ കരുതുന്നതു”
ഈ വാക്യത്തിൻ്റെ ഇംഗ്ളീഷ് പരിഭാഷ കൂടുതൽ മനോഹരമാണു.

“But he turned and said to Peter “Get behind me, Satan! You are
a hindrance to me.For you are not setting your mind on the things of God, but on things of man”
Mathew 16:23

എത്ര നല്ല മറുപടി. ക്രൂശില്ലാതെ
ക്രിസ്തീയ ജീവിതം ഇല്ല. ക്രൂശിനെ വിട്ടു ലോകമോഹങ്ങളിൽ മനസ്സിനെ ഉറപ്പിക്കാൻ ശ്രമിക്കരുതു. അതിനാൽ യേശു പത്രോസിനോടും ശിഷ്യന്മാരോടും
വീണ്ടും വ്യക്തമായി ഇപ്രകാരം പറഞ്ഞു.

“ഒരുത്തൻ എന്റെ പിന്നാലെ വരുവാൻ ഇച്ഛിച്ചാൽ തന്നെത്താൻ ത്യജിച്ചു, തന്റെ ക്രൂശു എടുത്തു എന്നെ അനുഗമിക്കട്ടെ.
മത്തായി 16:24

ഈ സത്യം ശരിയായി മനസ്സിലാക്കിയ പത്രോസ് തൻ്റെ ലേഖനങ്ങളിൽ കഷ്ടങ്ങൾ ദൈവത്തിൻ്റെ നിത്യ തേജസ്സ് അറിയുവാൻ നമ്മെ പ്രാപ്തരാക്കും എന്ന് പ്രബോധിപ്പിച്ചു.

” എന്നാൽ അല്പകാലത്തേക്കു കഷ്ടം സഹിക്കുന്ന നിങ്ങളെ ക്രിസ്തുവിൽ തന്റെ നിത്യതേജസ്സിന്നായി വിളിച്ചിരിക്കുന്ന സർവ്വകൃപാലുവായ ദൈവം തന്നേ യഥാസ്ഥാനപ്പെടുത്തി ഉറപ്പിച്ചു ശക്തീകരിക്കും”
1 പത്രൊസ് 5:10

യേശുവിന്റെ പ്രത്യക്ഷതവരും
വരെ മനസ്സിനെ ഉറപ്പിച്ചു ശക്തീകരിക്കുവാൻ പത്രൊസ് ആഹ്വാനം ചെയ്തു.

ദൈവത്തിനു താല്പര്യമില്ലാത്ത കാര്യങ്ങളിൽ മനസ്സിനെ കെട്ടിയിടരുതു.ആളുകൾ പറയുന്ന വാക്കുകളിൽ മനസ്സിടിയരുതു. ഒരിക്കൽ അഗബൊസ് എന്ന പ്രവാചകൻ,
പൗലോസിൻ്റെ മരണത്തെകുറിച്ചു പ്രവചിച്ചു പറഞ്ഞു. അതിനു പൗലോസിന്റെ
മറുപടി ഇപ്രകാരമായിരുന്നു.

“നിങ്ങൾ കരഞ്ഞു എന്റെ ഹൃദയം ഇങ്ങനെ തകർക്കുന്നതു എന്തു? കർത്താവായ യേശുവിന്റെ നാമത്തിന്നു വേണ്ടി ബന്ധിക്കപ്പെടുവാൻ മാത്രമല്ല യെരൂശലേമിൽ മരിപ്പാനും ഞാൻ ഒരുങ്ങിയിരിക്കുന്നു എന്നു ഉത്തരം പറഞ്ഞു.
അപ്പൊ.പ്രവ്യത്തികൾ 21:13

പൗലോസ് മനസ്സിനെ ഉറപ്പിച്ചതു
ദൈവത്തിലാണു. ദാവിദിൻ്റെ മുമ്പിൽ ഭയാനകമായ സാഹചര്യങ്ങൾ വന്നുപെട്ടു. കുന്തങ്ങളും അസ്ത്രങ്ങളും വാളും ഏന്തി ശൗൽ ദാവിദിനെ
കൊല്ലുവാൻ വന്നു. എന്നാൽ ദാവിദു തൻ്റെ മനസ്സിനെ ദൈവത്തിലേക്കു ഉയർത്തി സന്തോഷത്തോടെ പാടി.

“എന്റെ മനസ്സു ഉറെച്ചിരിക്കുന്നു; ദൈവമേ, എന്റെ മനസ്സു ഉറെച്ചിരിക്കുന്നു; ഞാൻ പാടും; ഞാൻ കീർത്തനം ചെയ്യും.”
57-ാം സങ്കീർത്തനം 7-ാം വാക്യം

ജീവിതഭാരവേളകളിൽ ഈ സംഗീതം നമ്മുടെ മനസ്സുകളിൽ
ഉറച്ചു നിൽക്കട്ടെ…അതു ദൈവക്യപയോടെ, കർത്താവിന്റെ പ്രത്യക്ഷതവരെ
മനസ്സിനെ ഉറപ്പിക്കുവാൻ നമുക്കു പ്രത്യാശ നൽകട്ടെ…