1) യേശുവിന്റെ നിമിത്തം പഴികൾ, ഉപദ്രവങ്ങൾ സഹിക്കുന്നതിന്.

ഈ ഭൂമിയിൽ യേശുവിന് വേണ്ടി നാം സഹിക്കുന്ന സകല പഴികൾക്കും,
നിന്ദകൾക്കും,പ്രതിഫലം ഉണ്ട്.

‘ എന്റെ നിമിത്തം നിങ്ങളെ പഴിക്കയും ഉപദ്രവിക്കയും നിങ്ങളെക്കൊണ്ടു എല്ലാ തിന്മയും കളവായി പറകയും ചെയ്യുമ്പോൾ നിങ്ങൾ ഭാഗ്യവാന്മാർ.
സ്വർഗ്ഗത്തിൽ നിങ്ങളുടെ പ്രതിഫലം വലുതാകകൊണ്ടു സന്തോഷിച്ചുല്ലസിപ്പിൻ”
മത്തായി 5:11,12

2) പാവപ്പെട്ടവരെ സഹായിക്കുന്നതിന്.

വലങ്കൈ ചെയ്യുന്നത് ഇടംങ്കൈ അറിയാതെ
പാവപ്പെട്ടവരെ സഹായിച്ചാൽ ആയതിന്
ഒരു വലിയ പ്രതിഫലം ഉണ്ട്.

“നീയോ ഭിക്ഷകൊടുക്കുമ്പോൾ നിന്റെ ഭിക്ഷ രഹസ്യത്തിൽ ആയിരിക്കേണ്ടതിന്നു വലങ്കൈ ചെയ്യുന്നതു എന്തു എന്നു ഇടങ്കൈ അറിയരുതു.
രഹസ്യത്തിൽ കാണുന്ന നിന്റെ പിതാവു നിനക്കു പ്രതിഫലം തരും.
മത്തായി 6:3,4

3) പ്രാർത്ഥിക്കുന്നതിന്.

പ്രാർത്ഥിക്കുന്നവന് ഭൂമിയിലും, സ്വർഗ്ഗത്തിലും
പ്രതിഫലം ഉണ്ട്.

“നീയോ പ്രാർത്ഥിക്കുമ്പോൾ അറയിൽ കടന്നു വാതിൽ അടച്ചു രഹസ്യത്തിലുള്ള നിന്റെ പിതാവിനോടു പ്രാർത്ഥിക്ക; രഹസ്യത്തിൽ കാണുന്ന നിന്റെ പിതാവു നിനക്കു പ്രതിഫലം തരും”
മത്തായി 6:6

4) ഉപവസിക്കുന്നതിന്

ഭക്ഷണം വെടിഞ്ഞ് പ്രാർത്ഥിക്കുന്നതാണ്
ഉപവാസം. ഉപവാസം അഭിനയമാകാതെ
ദൈവനാമം
മഹത്വപ്പെടാനാണെങ്കിൽ
സ്വർഗ്ഗത്തിൽ പ്രതിഫലം ഉണ്ട്.

“നീയോ ഉപവസിക്കുമ്പോൾ നിന്റെ ഉപവാസം മനുഷ്യർക്കല്ല രഹസ്യത്തിലുള്ള നിന്റെ പിതാവിന്നു വിളങ്ങേണ്ടതിന്നു തലയിൽ എണ്ണ തേച്ചു മുഖം കഴുകുക.
രഹസ്യത്തിൽ കാണുന്ന നിന്റെ പിതാവു നിനക്കു പ്രതിഫലം നല്കും”
മത്തായി 6:17,18

5) പ്രവാചകന്മാരേയും
നീതിമാന്മാരേയും
സ്വീകരിക്കുന്നതിന്.

” പ്രവാചകൻ എന്നുവച്ചു പ്രവാചകനെ കൈക്കൊള്ളുന്നവന്നു പ്രവാചകന്റെ പ്രതിഫലം ലഭിക്കും. നീതിമാൻ എന്നുവച്ചു നീതിമാനെ കൈക്കൊള്ളുന്നവന്നു നീതിമാന്റെ പ്രതിഫലം ലഭിക്കും”. മത്തായി 10:41

6) യേശുവിന്റെ ശിഷ്യർക്ക്
കൊടുക്കുന്നതിന്.

“ശിഷ്യൻ എന്നുവച്ചു ഈ ചെറിയവരിൽ ഒരുത്തന്നു ഒരു പാനപാത്രം തണ്ണീർ മാത്രം കുടിപ്പാൻ കൊടുക്കുന്നവന്നു പ്രതിഫലം കിട്ടാതെ പോകയില്ല എന്നു ഞാൻ സത്യമായിട്ടു നിങ്ങളോടു പറയുന്നു.”മത്തായി 10:42

7) ശത്രുക്കളെ സ്നേഹിക്കുന്നവർക്ക്.

യാതൊന്നും പകരം ഇച്ഛിക്കാതെ ശത്രുക്കൾക്ക് നന്മ ചെയ്യുന്നവർക്ക് പ്രതിഫലം ഉണ്ട്.

” നിങ്ങളോ ശത്രുക്കളെ സ്നേഹിപ്പിൻ; അവർക്കു നന്മ ചെയ്‍വിൻ; ഒന്നും പകരം ഇച്ഛിക്കാതെ കടം കൊടുപ്പിൻ; എന്നാൽ നിങ്ങളുടെ പ്രതിഫലം വളരെ ആകും”
ലൂക്കോസ് 6:35

8)ആത്മീയശുശ്രൂഷയിലെ
അദ്ധ്വാനങ്ങൾക്കും, സുവിശേഷം അറിയിക്കുന്നതിനും.

” നടുന്നവനും നനെക്കുന്നവനും ഒരുപോലെ; ഓരോരുത്തന്നു താന്താന്റെ അദ്ധ്വാനത്തിന്നു ഒത്തവണ്ണം കൂലി കിട്ടും”
1 കൊരിന്ത്യർ 3:8

” ഞാൻ സുവിശേഷം അറിയിക്കുന്നു എങ്കിൽ എനിക്കു പ്രശംസിപ്പാൻ ഒന്നുമില്ല. നിർബ്ബന്ധം എന്റെമേൽ കിടക്കുന്നു. ഞാൻ സുവിശേഷം അറിയിക്കുന്നില്ല എങ്കിൽ എനിക്കു അയ്യോ കഷ്ടം!
ഞാൻ അതു മനഃപൂർവ്വം നടത്തുന്നു എങ്കിൽ എനിക്കു പ്രതിഫലം ഉണ്ടു;
1 കൊരിന്ത്യർ 9:16,17

9) ദൈവത്തെ അന്വേഷിക്കുന്നവർക്ക്.

” എന്നാൽ വിശ്വാസം കൂടാതെ ദൈവത്തെ പ്രസാദിപ്പിപ്പാൻ കഴിയുന്നതല്ല; ദൈവത്തിന്റെ അടുക്കൽ വരുന്നവൻ ദൈവം ഉണ്ടു എന്നും തന്നെ അന്വേഷിക്കുന്നവർക്കു പ്രതിഫലം കൊടുക്കുന്നു എന്നും വിശ്വസിക്കേണ്ടതല്ലോ”
എബ്രായർ 11:6

10) സന്തോഷത്തോടെ സഹിച്ച അപഹാരങ്ങൾക്ക്.

ഈ ലോകത്തിൽ സമ്പത്തുകളുടേയോ
വസ്തുക്കളുടേയോ
മറ്റേതെങ്കിലും അപഹാരങ്ങളോ, വഞ്ചനകളോ, സന്തോഷത്തോടെ
സഹിച്ചാൽ അതിന് പ്രതിഫലം സുനിശ്ചിതം.

“തടവുകാരോടു നിങ്ങൾ സഹതാപം കാണിച്ചതല്ലാതെ സ്വർഗ്ഗത്തിൽ നിലനില്ക്കുന്ന ഉത്തമസമ്പത്തു നിങ്ങൾക്കു ഉണ്ടു എന്നറിഞ്ഞു സമ്പത്തുകളുടെ അപഹാരവും സന്തോഷത്തോടെ സഹിച്ചുവല്ലോ.
അതുകൊണ്ടു മഹാ പ്രതിഫലമുള്ള നിങ്ങളുടെ ധൈര്യം തള്ളിക്കളയരുതു”.
എബ്രായർ 10:34,35

ദൈവവചനം പ്രമാണിച്ച് ജീവിക്കുന്നവന് പ്രതിഫലം ഉണ്ട്. ദൈവം നമ്മുടെ മഹത്തായ പ്രതിഫലം ആകുന്നു.

“ഇതാ, ഞാൻ വേഗം വരുന്നു; ഓരോരുത്തന്നു അവനവന്റെ പ്രവൃത്തിക്കു തക്കവണ്ണം കൊടുപ്പാൻ പ്രതിഫലം എന്റെ പക്കൽ ഉണ്ടു.
വെളിപ്പാട് 22:12

ഭൂമിയിലെ ഫലങ്ങൾ നോക്കി ജീവിക്കാതെ
സ്വർഗ്ഗത്തിൽ നിക്ഷേപം കൂട്ടി മഹത്തായ പ്രതിഫലം വാങ്ങുവാൻ ഒരുങ്ങിയിരിപ്പിൻ.